我成日都會諗，點解我會有糖尿病，唔係老人家先有架咩？
上網搵資料，加上醫生講解，先知原來依家有一成幾的成年人係二型糖尿病患者，粗略一計，即係有成差不多七十幾八十萬人同我一樣係「糖友」（即係有糖尿病的朋友）。而且因為肥胖超重問題愈嚟愈普遍，估計「糖友」會繼續增加，唔使幾耐就可能突破百萬大關。
以前d糖友真係年紀比較大的，身體機能退化，所以胰島素唔夠用，但依家就好多後生仔女，因為無節制飲食同埋唔做運動，於是好早就開始有糖尿病。好似我咁，呢幾年都留係屋企照顧啲仔女，無出去做嘢，平日都係做下家頭細務，幾何會去跑步、游水呀？
醫生話，愈後生有糖尿病就要愈小心控制個病，如果唔係未老就已經有好多併發症出晒嚟。
血糖高唔淨止係個數值高咁簡單，原來長期血糖過高會令全身的血管都受到破壞，令到心血管疾病的風險高咗好多，例如二型糖尿病人有心臟衰竭的機會比無糖尿病的人高三倍，心血管疾病風險更大增四倍，當中重有一半人會死於心血管疾病。
醫生仲話，除咗心血管病之外，糖尿病亦都會影響眼的視網膜，即係成日聽到的糖尿上眼，同時又會影響個腎，導致蛋白尿同腎衰竭，依家有五、六成要洗腎的病人都係因為糖尿病所致！
另外，神經系統都會受到破壞，引起糖尿腳，出現感覺遲鈍、易感染同傷口難癒合同潰瘍等等，嚴重的重要截肢添！！！！
坦白講，聽到醫生講到咁多併發症，真係個心都即時實晒。可能醫生見到我無咩表情，即時安慰返我，話只要聽聽話話，好好咁控制好血糖的水平，咁就唔會咁易有併發症架啦。
