知道有糖尿病，我自己都覺得好突然，有朋友就問：有病無理由唔知架喎，會唔舒服架嘛？
我都有咁既疑問，所以都問過醫生。醫生話，糖尿病初期通常都無咩明顯徵狀，唔少係好似我咁驗身驗到，如果唔驗就真係唔會知。
不過，醫生就話，如果血糖持續高企，經過一段時間後身體出現變化，就會有啲徵狀，包括多尿或尿頻、體重下降、容易病（因為免疫力差左）、容易疲倦、傷口好難好番等等。
點解咁多人有糖尿病？聽醫生講，糖尿病有兩大類型，一型糖尿病屬於先天性問題，身體因為無法製造胰島素所致，但呢類屬於少數，九成以上個案都係二型糖尿病，同不良的飲食習慣、肥胖同唔多做運動有關，病人的身體對胰島素產生抗阻，令胰島素做唔到野，於是令血糖上升。
其實，糖尿病唔係一嚟就嚟，如果血糖值偏高但又未去到糖尿病的水平，只係屬於糖尿病前期，若果可以係呢個階段就知道，改善飲食同生活習慣係可以令糖尿病唔會發生。
我就錯過咗呢個黃金機會啦，希望大家唔好學我咁，要早啲去驗下呀～
