有d事，知道左，都唔知係好定係壞。
話說去年生日時，老公送了一份特別的生日禮物給我──全套驗身計劃。他話，我為頭家辛苦多年，擔心身體可能捱壞了，所以想我去check下，確保我可以繼續照顧多佢幾十年。
既然老公講到咁sweet咁體貼，我就當然好聽話咁去驗身啦。
搞咗一日，由頭驗到落腳，大致都健康正常，唯獨有一樣──血糖──出了問題。醫生說，檢查顯示我的空腹血糖比正常高咗好多下，所以要我再做多一項飲糖水檢查，亦要驗乜鬼嘢「糖化血紅素」，先至可以確定。
結果，三項血糖檢查都顯示我的血糖值超晒標，亦即係話，我有糖尿病。
聽到呢個結果，我心情當然唔太好，邊個想做病人先得架？而且，醫生話糖尿患者帶有心血管疾病平均會短12年命呀！真陰公！但老公就話，早啲發現早啲醫咁重好，如果唔係今次驗身，可能唔知幾多年之後先知，到時可能已經病到好嚴重啦。
老公咁講都啱。
其實，我啲朋友都一早叫我要驗一驗，因為佢哋有啲都係四十出頭就驗到有糖尿病，尤其有個肚腩（我認，我有個幸福車軚，邊個師奶無呀！），係高風險人士。
老公驚我亂咁諗，所以好快手約咗睇專科。醫生好細心咁用咗大半個鐘，同我解釋比我聽個病係乜嘢嚟，成因係乜嘢，會引起啲乜嘢後遺症等等。（題外話，呢個醫生幾靚仔，但當然我老公型啲啦！）
既然有病，就當然要食藥啦。而除咗要食藥之外，亦都要改變下飲食習慣，重要做下運動，如果可以減到啲磅數，對個病的控制會好好多。
就係咁樣，我同糖尿病開始咗啦～
老公、仔女、醫生都叫我樂天面對，所以我就開咗呢個blog，分享下我的經驗……經歷先啱。
