有糖尿病，當然就要食藥啦。本來以為食粒藥啫，好簡單，但估唔到我都衰咗。
第一次見完醫生，佢就開咗一隻叫甲福明（Metformin）既藥俾我食，好似係一種舊D嘅藥。醫生解釋，呢隻係治療糖尿病的一線藥物，雖然用咗好耐，但對好多病人都有效，而且價錢平。所以醫生叫我試左先，唔啱先再轉或加藥。
佢都有同我講，除咗食藥之外，都要控制飲食，重要做多啲運動，如果可以縮細個幸福車軚，咁就會好好多。
我嗰日就已經開始食藥，而且夜晚即刻食少啲飯，由一大碗變咗小半碗，食多啲菜咁。之但係未到瞓覺已經有啲餓，但我都死忍住唔去偷食。
不過，有時真係好難控制食幾多，係屋企就重好啲，出街就真係大鑊。好似同阿仔阿女去街，佢哋乜都叫嚟食，但每樣食兩啖就話飽，我又唔想嘥嘢，於是乎就掃晒入口。
結果覆診嗰陣，我都唔係好敢面對醫生，而結果亦都顯示我的血糖值仍然高企，唔知係啲藥無效定食嘢影響。醫生於是加咗藥比我，叫我再試兩個星期睇下。
醫生都安慰我，話有差不多一半的糖友都會咁樣，要啲時間試下睇下邊隻藥最啱，同埋要用幾多藥先得。佢同我講唔使太心急，呢隻藥唔得都重要其他藥可以用，總有一隻啱使，叫我放心咁話。
於是，我又食多兩個星期，唔知係咪啲藥重咗的關係，我有啲作嘔作悶咁，又有肚痾，都幾唔舒服下。同埋，唔知點解，明明我已經開始在屋企跳鄭多燕，平日都搭少啲車行多啲路，但個肚腩都係無細到。
好快又要見醫生，壓力好大呀～～～
