糖尿病可以引起好多唔同的併發症，我上網查到國際糖尿聯盟統計，全球每年約有460萬人死於糖尿病的併發症，即平均約每7秒便有一人死於糖尿病。所以真係唔好睇小呢個病呀~
有左糖尿病，若果血糖長期控制不當，就會引起各種併發症，好似「糖尿心」同「糖尿腎」咁，你都咪話唔驚！怕死的我即刻去搵下可能會有咩併發症，順便copy埋過來share。
原來糖尿病併發症可以分為急性同慢性兩大類：
l 急性併發症
主要是血糖過高或血糖過低，前者多數係因為唔記得食藥，而後者則可能因唔小心食多咗藥或食咗藥但無食飯所致。無論是血糖過高或過低，都可以引起急性併發症，導致患者失去知覺或昏迷，嚴重者重可以致命。
要減低急性併發症發生的機會，糖友就要聽醫生話食藥啦，例如用一啲有提示功能的藥盒，又或寫低用藥記錄，咁就可以減少唔記得同埋食錯藥的情況，依家重有啲手機app可以提醒你食藥，唔識可以搵啲後生幫手dl。如果成日都搞錯，就可能要同醫生傾傾，可能用隻副作用少啲的藥會好啲。
l 慢性併發症
主要是糖尿病控制得唔好，血糖長期過高令血管受到破壞，於是就形成慢性併發症，包括大血管病變，可引起腦栓塞、中風、冠狀動脈栓塞，而小血管病變則則可引起視網膜病變、白內障、青光眼、蛋白尿、腎衰竭及神經病變等，而糖友的抵抗力會較差，容易受細菌感染，男性更可能會出現性功能障礙。
除了控制血糖水平，糖友亦都要監察血壓和血脂，原因係高血壓會對血管內壁構成損害，增加糖友出現血管粥樣硬化，令血管硬化及收窄，誘發心血管疾病發生。而高血壓亦都會加速糖尿腎病及糖尿病視網膜病變等問題。（我照書講架咋！想知詳細啲梗係搵醫生問啦!）
所以控制血壓於理想水平，對糖友嚟講都非常重要。
講左咁耐，搞到各位糖友好似好驚咁!其實要減低併發症，糖友最緊要都係聽醫生話食藥，同埋控制飲食，加埋做多啲運動，咁血糖控制得好，併發症就唔會咁易有。
